(Dok 148).Diverse artiklar publisert offentleg i aviser mv. i 2026.

1. 1. Håp for rassikring i Lodalen.
Har ropt etter rassikring i årevis.

Publisert i Fjordingen 16/1-2026.

Av: Roger Oldeide (roger.oldeide@fjordingen.no)

Snøskred over vegen ved Merkingsgjølet i Lodalen natt til måndag. Fv. 5723 vart preventivt stengt mellom kl 17. måndag og til kl 09. tysdag. Ingen kom til skade i skredet.

Lodalen veglag har ropt etter rassikring ved Merkingsgjølet i mange år, men no skal vegeigaren vurdere tiltak på strekninga.

Har ropt etter rassikring i årevis:

Måndag morgon gjekk det eit seks meter breitt snøskred over fylkesvegen ved Merkingsgjølet i Lodalen. Jan Ove Hogrenning, som er busett i Lodalen, rydda sjølv bort skredet og det er ikkje første gong.

– Det er lite snø i høgda, men eg ser ikkje vekk frå fleire skred her, sa han måndag.

På høg tid med tiltak

Lodalen Veglag vil igjen minne vegeigaren om behovet for rassikring av vegstubben forbi dei relativt små skredløpa Merkingsgjølet, Raudifonna og Vesle Merkingsgjølet.

Veglaget opplyser at det går skred over vegen i dette området fleire gongar i året.

Dei trur det er lite som skal til for å betre situasjonen.

– 70 – 80 prosent av alle snøskred ved denne vegen går i eit svært avgrensa område. Vi er ikkje byggingeniørar, men to 75 meter lange rasoverbygg hadde nok løyst problemet.

Vi har bedt om skredsikringstiltak i mange, mange år men enno har ingenting skjedd. Det er på høg tid med tiltak, seier Anne Sølvi Sande på vegne av seg sjølv og Lodalen Veglag.

Ho er ein av ti personar som er fast busett aust for Merkingsgjøla og vert isolert når skred eller skredfare fører til stengd veg.

– Eg må ta meg fri frå jobb når vegen er stengd. I fjor var eg borte fire dagar frå jobb og året før var eg borte i ti arbeidsdagar på grunn av dette, fortel ho.

Sannsynleg med sju skred kvart år

Vestland fylkeskommune, som er vegeigar, gjer det klart at dei er godt kjend med skredpunkta Vesle Merkingsgjølet, Raudifonna og Merkingsgjølet som har høvesvis forventa årleg skredsannsyn på 1,40, 0,80 og 7,70.

Årleg skredsannsyn vil seie kor mange skred og ras ein estimerer at det kjem ved eit punkt kvart år. Skredhistorikken dei siste 30 åra og fagleg skjønn vert lagt til grunn i vurderinga.

– Årleg skredsannsyn på 7,70, som ved Merkingsgjølet, betyr at det er sannsynleg med sju skred i løpet av eit år og nokre år fleire. Snøskred er særleg avhengig av ver og vind, difor kan det variere frå år til år om det går mange eller få skred, og ikkje minst kor store skreda blir, forklarar rådgjevar i Vestland fylkeskommune, Monika Øksnes.

Forprosjekt i Lodalen

Ho fortel at for Vesle Merkingsgjølet og Merkingsgjølet er det forslag om automatisk skredvarsling og skredoverbygg. For Raudifonna er det forslag om større bru enn den som er der i dag, med automatisk skredvarsling.

Ho fortel at det er sett i gang eit forprosjekt som skal greie ut om montering av automatisk varslingsanlegg skal vere ei permanent løysing i Lodalen, eventuelt fram til vegen vert prioritert.

– Forprosjektet skal resultere i ei fagleg tilråding til sikring av strekninga. Fylkestinget prioriterer skredsikringstiltak gjennom den årlege budsjetthandsaminga, forklarar Øksnes.

– Når kan ein forvente at ei tilråding er klar og arbeidet eventuelt kan begynne i Lodalen?

– Vi siktar på å ferdigstille forprosjektet i løpet av året. Om det vert tilrådd å gjennomføre større tiltak, som til dømes å byggje skredoverbygg, må det avklarast om det er behov for ny reguleringsplan. Så er det fylkestinget som prioriterer skredsikringstiltak gjennom den årlege budsjetthandsaminga, forklarar Øksnes.

2. Skal bli naturreservat i Loen.

Publisert i Fjordingen 3/2-2026.

Av: Gunnhild Sindre (gunnhild.sindre@fjordingen.no)

Dette er området som er føreslege til å bli Loen naturreservat.Ilustrasjon frå Statsforvaltaren i Vestland.

Det er føreslege at eit nær 800 dekar stort skogsområde i Loen skal bli verna som Loen naturreservat.

Statsforvaltaren i Vestland har no sendt forslaget ut på høyring.

Det føreslegne verneområdet omfattar totalt 778 dekar. Arealet ligg i sørvendt li ved Lobukta og er eigd av private grunneigarar, som har tilbydd å verne skogen etter ordninga med frivillig skogvern.

Nordlegaste i landet

Området er vurdert til å vere ein av dei mest verdifulle edellauvskogane i gamle Sogn og Fjordane.

Dette er den nordlegaste kjente førekomsten av gammal eikeskog i Norge, opplyser statsforvaltaren i samband med høyringa.

I slike gammal eikeskog finst fleire artar som er kravfulle eller raudlista, og som er avhengige av gamle tre for å overleve.

Forslaget til verneplan omfattar ikkje berre avgrensing av område, men også detaljar om korleis området skal forvaltast ved eit eventuelt vedtak.

Grunneigarane vil framleis ha rett til jakt og fangst, og området vil kunne nyttast til friluftsliv og sanking av sopp og bær. Beiting og vedlikehald av eksisterande turstiar slik dei er på vernetidspunktet er også generelle unntak frå vernereglane. All ferdsel skal skje varsamt og med omsyn til vegetasjon, dyreliv og kulturminne.Motorisert ferdsel er forbode, med unntak av naudsynt uttransport av felt vilt eller sjuke/skaddebufe. For redningsaksjonar gjeld det eigne reglar.Aust i området ligg stien som er mykje brukt for å kome seg opp til startpunktet for viaferrataen. På startpunktet for via ferrataen, der ein tek på seg sele, tau og sikringar, ligg eit utkikkspunkt i form av ein plattform. Her er grensa lagt slik at utsiktspunktet ligg utanom, så det skal kunne drivast vedlikehald og rydding av sikt kan gjerast.

Kome med innspel

Loen Skylift går i lufta over kandidatområdet, men har ikkje anlegg på bakken innanfor vernegrensa. Frå toppen er det luftsportsaktivitet.

Vi vurderer at verken skyliften eller aktiviteten i/over området er i konflikt med vernet, skriv statsfrovaltaren i vereforslaget.

No er tida inne for at innbyggjarar, organisasjonar og andre å kome med innspel i samband med verneplanen. Høyringa pågår til 1. april. I høyringsdokumentet er det både kart og forslag til verneføresegner som forklarer kva som kan ende opp med å bli verna, og kva reglar som då gjeld for bruk av området.

3. Speedgliderulukke i Loen.
(Sjå også artikkel 8)

Publisert i Fjordingen 3/3-2026.

Av: Bent Flaten /Thomas Thaule

Innsatsleiar i politiet, Morten Hagen. FOTO: Thomas Thaule, Fjordingen.

Det var 29 år gamle Joachim Havnegjerde Huse frå Ålesund som omkom i ein speedgliderulukke frå Hoven i Loen søndag.

Ulukka skal ha skjedd under Huse sitt første utsprang frå Hoven denne dagen. Ifølgje politioverbetjent Vidar Stavik ved Stryn politistasjon har mannen vore på Hoven for å flyge også tidlegare.

Stavik som jobbar med etterforskinga etter ulukka fortel at dei no konsentrerer seg om å prate med dei som var med han og flaug denne søndagen.

Så vil vi samarbeide med Luftsportsforbundet blant anna rundt kompetanse og kursing.

Vi vil gjennomgå video frå Hoven for å sjå om utspranget vart filma. Han sprang ut frå den vanlege utspringsplassen ved sidan av skyliften, opplyser Stavik.

Det var sol frå skyfri himmel søndag, og Stavik seier forholda blei definert som gode. Det var ein god del folk på Hoven for å flyge denne dagen.

Etter utspranget til 29-åringen gjekk det gale, og han vart funnen i fjellsida nedanfor Hoven, på om lag 600 meters høgde. Hoven ligg på 1.010 meter over havet.

Femte dødsulukka

Dødsulukka søndag er den femte frå Hoven sidan 2019. I tillegg har det vore ulukker med alvorleg personskade.

I april 2019 omkom ei kvinne i speedgliderulukke, i juli 2021 omkom ein kvinneleg basehoppar. I januar 2023 omkom ein mann i speedgliderulukke og i mai 2024 omkom ein mann i paragliderulukke. Og 1. mars 2026 omkom 29 år gamle Joachim Havnegjerde Huse i speedgliderulukke.

4. Nytt servicebygg for Loen Activ.

Publisert i Fjordingen 27/2-2026.

Av: Roy Aron Myklebust (roy.aron.myklebyst@fjordingen.no)

Eit nytt servicebygg for Loen Activ er i ferd med å reisast ved fjorden i Loen. Foto Roy Aron Myklebust.

Her byggast det for fullt. Eit nytt servicebygg byrjar å ta form ved fjorden i Loen. Bygget på totalt 270 kvadratmeter ved Loen Marina tilhøyrer Loen Active og er mynta på aktivitetane som føregår på vatnet.

Det erstattar blant anna det litt skjemmande teltet vi har hatt der kvar sommar, seier Endre Håberg, prosjektleiar hos Hotel Alexandra.

Det har ikkje sett så fint ut og når det har kome stormar er det «armar og bein». No får vi eit bygg som ser ordentleg ut og som fungerer for framtida.

«Naust-look»

Håberg fortel at bygget får ein «naust-look» og vil ha ein grå farge med svarte kontrastfelt, som gjer at det skal gli fint inn i området. Også det eksisterande bygget som skaffar fjordvarme til begge hotella er integrert i bygningsmassen.

Servicebygget blir eit møtepunkt for dei som ønskjer å leige kajakkar, trøbåtar, robåtar og andre tilbod som kjem etter kvart. Her blir det lager, tørkerom, resepsjon, garderobar og vaskefasilitetar.

Ope for alle

Håberg understrekar at dette er eit tilbod til alle, ikkje eksklusivt for hotellgjester.

Vi såg det var masse folk som bada i området i fjor sommar, og vi lagar takoverbygg på austsida og har tankar om ein sommarkiosk. Ein slags is- og brusbar.

Ambisjonen er å kunne ta i bruk i alle fall utstyrslokala til årets sesong.

5. Slik vert tomteprisane i Solvik.

Publisert i Fjordingen 13/3-2026.

Av: Roger Due-Oldeide(roger.oldeide@fjordingen.no)

Det sørvestre bustadfeltet i Solvik er ferdigstilt. No skal tomtene prissettast.

Stryn kommunestyre skal ta stilling til tomteprisane i Solvik bustadfelt.

Stryn kommune skal leggje 21 tomter for einebustadar og tre tomter for konsentrert bustadbygging i Solvik ut for sal. Torsdag skal prislista leggjast fram for kommunestyret.

Einebustadtomtene, som er i storleik 854 m² til 990 m², vil koste 1,3 til 1,5 millionar kroner. Tomtene for konsentrert bustadbygging, som er mellom 2524 m² til 4573 m², er tilrådd ein pris mellom 5,5 til 7,6 millionar kroner.

Til prosjektet høyrer med etablering av ny vasspumpestasjon og kloakkpumpestasjon som er under oppføring. Deler av kostnadane for dette er lagt til tomtene og resten vert fordelt som sjølvkost då anlegget vil tene abonnentane også utanfor bustadfeltet, framgår det i saksframlegget.

Asplan Viak AS har stått for prosjektering medan Volda Maskin AS har opparbeidd bustadfeltet. Stryn kommune har hatt prosjektleiinga med Anders Maurset (BM prosjekt) som innleigd byggjeleiar.

6. Ann Kristin Avdem Omberg/Grande kjem heim som prest.

Publisert i Fjordingen 20/3-2026.

Av: Gunnhild Sindre (gunnhild.sinndre@fjordingen.no)

Ann Kristin Avdem Grande gler seg over å kome heim til Nordfjord som prest. FOTO: Gunnhild Sindre

Det var ingen bein veg ho gjekk, Ann Kristin frå Loen. I fleire år var ho utmeld av statskyrkja og engasjert humanetikar. No kjem ho heim til Nordfjord som sokneprest.

Ho er fødd Ann Kristin Avdem Omberg, med etternamna til mor og far. No heiter ho Ann Kristin Avdem Grande.

Eg fekk ikkje alle namna med meg då eg gifta meg, forklarer ho.

Ville nærare familien

Ann Kristin kom til verda på Nordfjord sjukehus, og vaks opp i Loen. Foreldra var først ved Yri’s Hotell i Olden, så dreiv dei Richards Kro & Motell i Loen. Seinare var begge uløyseleg knytte til Hotel Alexandra. Difor har hotellet også spela ei stor rolle i Ann Kristin sin oppvekst. 10–12 somrar jobba ho her, også litt ettermiddagar og kveldar etter skuletid.

I mange år har ho budd vekke, siste seks åra som sokneprest i Vikna i Ytre Namdalen. No ønskte ho seg heim til Nordfjord.

Eg ville gjerne kome litt nærare familien her, få litt meir tid med dei. Eg har kjent på saknet, spesielt når eg har vore heime ein tur. Og så har eg bestevenninna mi i Olden, ho har vore ein pådrivar ho også, fortel ho.

Ann Kristin er no sokneprest i Eid og Stårheim sokn.

Kvifor Eid og ikkje Stryn, når det er ledig stilling her også?

Ann Kristin tenkjer litt. – Det var eit vanskeleg val. Men det kan kanskje rett og slett bli litt for nært å vere prest i bygda der ein har hatt heile oppveksten sin. Eid hadde også ein utlysingstekst som trefte meg veldig. Det er full kantorstilling her, det betyr litt ekstra å spele på i samarbeidet med organist. Eg har jobba mykje med kultur før, gospelkor, keltisk musikk, tema-kulturkveldar. Eg ser føre meg å ta opp igjen dette etter kvart. Men først skal eg gjere meg kjend i lokalsamfunnet.

Melde seg ut

Ho hadde ei sterk barnetru, og ho var med i barnekor og ungdomskor i Olden i kristen regi.

Men Ann Kristin var «lite føre seg» som barn. Så steget til å stå framfor ein kyrkjelyd og forkynne er ganske stort. Ikkje var vegen bein heller.

Ho gjekk på Nordfjord Folkehøgskule på Vereide, ein kristen folkehøgskule som vart veldig viktig for å forme henne som menneske, fortel ho. Og ho kunne nok ha tenkt på teologistudiet tidlegare, om ho hadde vore i det rette miljøet. No vart det bomtur på frisørlinje og deretter allmennfag på ein vidaregåande skule i Kristiansund. Og endå viktigare: Ho melde seg ut av statskyrkja og vart medlem av Human Etisk Forbund.

Dette kan nok i stor grad tilskrivast svært negativ påverknad frå ein prest, seier ho. Ho vart så provosert at ho tok avstand.

Hadde mista noko

Etter «ex.phil.» og grunnfag i psykologi, vart det lærarskulen. Samstundes var ho aktiv med i Human Etisk Forbund i Trondheim. Men på lærarskulen skjedde det noko. Faget som den gongen heitte KRL, kristendom, religion og livssyn, engasjerte henne veldig. det som skulle skje, seier ho.

Men eg bad mykje, og eg fekk bønesvar.

Mykje løsna då ho var ute i praksis, og hadde KRL-time i barneskulen. «Ein skulle tru du hadde ei sterk gudstru», sa rettleiaren hennar sa i etterkant. Det vart ein tankevekkjar.

Eg følte formidling i KRL låg sterkt for meg. Og faget var veldig interessant, det var bibelforsking, ein heil vitenskap, ikkje berre dogmer, seier Ann Kristin.

Eg grubla veldig. Tenkte på at eg kjem frå ein kristen kultur, at eg hadde mista noko.

Samstundes hadde ho blitt agnostikar, ho ville ikkje vere fundamentalistisk. – Men du veit, så snart du opnar for at det kan vere noko der, så får du aldri fred, seier ho og smiler litt.

Så var det romjula 1999. Ann Kristin var inne i ei livskrise, kjende at ho trong litt hjelp.

Eg sat på pikerommet i Loen og såg bort på Lokyrkja og det gamle keltiske korset. Og så kjende eg at «ja, no skal eg vere ein kristen». Då kjende eg at eg fekk fred. Det var ikkje verre.

Noko som drog i meg

Dei diskuterte det i KRL-klassen: Kan du som lærar fortelje at du er kristen? Ann Kristin rekte opp handa. Dette var ein fin måte å fortelje til alle standpunktet ho hadde teke.

Eg kan seie «ja, eg trur på Jesus som min frelsar, men du kan tru på det du vil», sa ho.

Det var litt summing og mumling i klassen. Kva sa ho no? Dette var det ingen som hadde venta frå den kanten. Men no var det gjort.

No vart ho med vener i fleire meinigheiter, kom i prat med studentprestane, prøvde å halde litt andakter. Tok mellomfag i kristendom som fjerde året på lærarutdanninga. Samstundes var det noko meir, kjende ho.

Eg var blitt ein kristen, skulle eg ikkje vere fornøgd då? Men det stoppa ikkje opp, det var noko som drog i meg, fortel ho.

Så vart det hovudfag i kristendom. Ho tok også gresk. Var aktiv studentmeinigheita, tekstlesar i Nidarosdomen. Ho tenkte på forkynning, og kjende at ting fall veldig på plass.

Eg har mykje å takke studentprestane for. Eg møtte ein veldig raus kristendom, seier ho.

Hovudoppgåva hennar var om homofile si oppleving i Den norske kyrkja. – Eg vier homofile. Men eg har ikkje noko problem med kollegaer som har eit anna syn. Annleis tenkjande menneske er ikkje farleg, seier ho.

Store kontrastar

Praktikum melde ho seg opp på i Tromsø. Prestevikariat i studietida gav meirsmak, og i 2010 vart ho ordinert. Prostiprest i vikariat, den første faste jobben var som sokneprest i Nærøy og Foldereid. Siste seks åra i var ho sokneprest i Vikna.

Eg treivst veldig godt i Namdalen. Eg fann mannen min, Knut, der. Og vi fekk vår nydelege dotter Evelina, fortel ho.

Same morgon som ho hadde fått vite at ho venta barn, small det på Utøya og i Regjeringskvartalet. Det vart ein dag med store kontrastar. Bispedømekontoret gav beskjed om at ho skulle vere i beredskap.

Dagen etter via ho eit brurepar, etter det opna ho dørene for redde og sørgjande.

Det var ein veldig sterk dag, frå den største lukka til den djupe sorga, seier ho.

Å vere presten, den som skal skape ei god ramme midt i sorga, må vere krevjande?

Fekk livet i gåve

Det er på ein måte ein styrke. Fint å kunne vere den som held trådane saman, midt i det meiningslause.

Ann Kristin og Knut fekk ikkje fleire barn. I staden skulle livet ta nye vendingar.

Vi mista eit barn i svangerskapet, fem år etter. Så fekk eg påvist lymfekreft, seier ho enkelt.

Det såg veldig lite lovande ut. Prognosane var dårlege.

Men eg overlevde, og eg kom meg i jobb igjen, trass seinskadar. Så eg har fått livet i gåve fleire gongar, føler eg, seier Ann Kristin, med varme i stemma.

Er det ein styrke for deg i arbeidet som prest?

Ja, det trur eg nok.No gler ho seg over å vere i heimdistriktet, sjølv om ho legg til at ho kjem til å sakne både vener, kollegaer og svigerfamilie i Namdalen.

Samstundes har eg kjent på saknet etter familien her, så det blir godt å vere i Nordfjord. Både for å vere nærare dei, og for å kunne ta opp igjen trådar. Det er folk som har teke kontakt som eg ikkje har sett sidan ungdommen. Så det blir fint.

Og når ho har høve til det, tek ho nok ein tur og ser bort på Lokyrkja og den keltiske krossen også. På mange måtar var det her livet hennar tok den viktige vendinga.

7. Positiv til badestove i Loen.

Publisert i Fjordingen 24/3-2026.

Av: Roy Aron Myklebust (roy.aron.myklebust@fjordingen.no)

Det er her ved nærmiljøanlegget i Lovik at Loen IL vil etablere badstove og flytebrygge. Her frå vårryddeaksjonen i 2021. FOTO: Roy Aron B. Myklebust

Formannskapet i Stryn er positive til etablering av badstove og flytebrygge i strandsona i Loen.

Det er Loen IL som står bak søknaden om etablering av ei flytebrygge med ei grunnflate på ca. 8 m² og ei frittliggjande badstove med 15 m² grunnflate.

Området der badstova skal etablerast ligg i Lovik og har over tid vore nytta som nærmiljøanlegg og rekreasjonsområde for lokalbefolkning og tilreisande. Arealet er ope for allmenn bruk, og der er også ei badestrand. Her har 4H etablert gapahuk, toalettbygg og sandvolleyballbane.

I plan og bygningslova er det eit generelt byggjeforbod langs sjøen, og idrettslaget har søkt dispensasjon frå dette forbodet. Kommunen stiller seg også positive til planane, og meiner tiltaka vil tene føremålet i reguleringsplanen.

Ettersom badstova og flytebrygga fremjar friluftsføremålet, bruk og aktivitet i området, kan ikkje kommunen sjå at tiltaket vil gi nemneverdige ulemper, står det i saksutgreiinga.

Det vert også vurdert at tiltaket er av mindre karakter, og plassert i eit område som allereie vert nytta til m.a. naust, camping og skule.

Klagevurdering

På denne bakgrunnen er det kommunen si vurdering at ein dispensasjon ikkje vil medføre at strandsoneomsyna i pbl. § 1-8 vert vesentleg skadelidande.

Formannskapet støtta tilrådinga då søknaden vart handsama førre veke. Førebels er det gjeve dispensasjon frå byggjeforbodet i strandsona. Sjølve tiltaket, oppføring av badstove og flytebrygge, krev eigen søknad og skal handsamast administrativt i eiga sak, kjem det fram av vedtaket.

Korleis Statsforvaltar stiller seg til vedtaket er framleis noko uvisst.

Grunna stor saksmengd har Statsforvaltaren gjeve ei generell uttale til søknaden, der det mellom anna vert påpeika at kommunen er ansvarleg for å vekte alle relevante omsyn i samband med søknad om dispensasjon, opplyser kommunen i saksutgreiinga.

Det vert lagt til at Statsforvaltaren har bede om å få tilsendt kopi av møteboka med vedtaket, til klagevurdering.

8. Speedglidar ulukka ved Hoven 1. mars.
Mista kontrollen ved takeoff.
(Sjå også artikkel nr 3).

Publisert i Fjordingen 31/3-2026.

Av: Begnt Flate (bebgt.flaten@fjordingen.no)

Den omkomne vart funnenpå 600 meters høgde nedanfor Hoven, i området omtrent midt i bildet. FOTO: Bengt Flaten

Mannen som omkom i ein speedgliderulukke på Hoven 1. mars mista kontrollen i det han skulle ta av. Han brukte ski, og har sannsynlegvis kome ned på grus rett før takeoff.

Politiet om dødsulukka på Hoven:

Dette er politiet sin førebelse konklusjon etter å ha gått gjennom videoar og gjennomført vitneavhøyr.

Politioverbetjent og tenestestadsleiar ved Stryn politistasjon Vidar Stavik, opplyser at politiet i tillegg til vitneavhøyr har henta inn video frå skyliften som viser delar av hendinga.

Startområdet var snødekt

Så har vi og fått video frå eit vitne som stod på toppen og filma. Ut frå dette har vi danna oss eit bilde av kva som skjedde.

Stavik fortel at mannen starta på det tilrettelagde startområdet ved sidan av skyliften, og med ski på beina. Noko som er vanleg vinterstid.

Startområdet var snødekt. Men det vi ser av video og spora etter han, er at han sannsynlegvis har kome ned på grus i enden av startområdet. Og at han har mista kontrollen rett før han skulle ta av. Vi ser ikkje videoopptak av at han fer utfor kanten. Då forsvinn han ut av syne. Men vi ser at skjermen går mot høgre i det han mistar kontrollen og forsvinn ut av filmen, seier Stavik.

Har hatt eit høgt fall

Det som skjer etterpå, er noko uklart, ettersom det ikkje finst video.

Men vi veit at han gjekk i stor fart nedover fjellsida. Og dei som såg han forsvann nedover såg at skjermen ikkje var open. Mannen blei funnen i eit mindre bratt område på ca. 600 meters høgde over havet. Skjerm og utstyr låg att lenger oppe i terrenget, og det ligg der framleis. Politiet håpar å få dette ned når snøen har smelta, seier Stavik.

Han har hatt eit høgt fall, kast i kast, og vår oppfatning er at han omkom momentant i fallet, seier Stavik. Den forulukka blei henta ut av redningshelikopter, og dette gjekk gjekk greitt frå der han låg.

Stavik seier politiet ikkje er heilt i mål med etterforskinga, sjølv om dei har konkludert med sannsynleg årsak.

Vi har sendt video og informasjon om etterforskinga vår til uttale frå luftsportsforbundet for å få ein fagleg uttale på kva som er årsaka. Så er fokuset vårt om det er noko som kan gjerast i det førebyggjande sporet. For å lære av ulukka og hindre at tilsvarande skjer igjen, seier Stavik.

9. Vilkår for utleige ved utbygging av Solvik bustadfelt.
Mista kontrollen ved takeoff.
(Sjå også artikkel nr 3).

Publisert i Fjordingen 24/4-2026.

Av Roy Aron Myklebust (roy.aron.myklebust@fjordingen.no)

Dei første tomtene i Solvik bustadfelt er selde. Her frå avkøyringa i Solvik. FOTO: Roy Aron B. Myklebust

Som det første kommunale bustadfeltet i Stryn set kommunen avgrensingar for korttidsutleige i Solvik. Den første søknaden om endring av vilkåret er allereie komen. (Sjå også artikkel 15 publisert 5/5-2026)

Dei første tomtene i det nye kommunale bustadfeltet i Solvik vart selde i midten av april. Det nye vilkåret, som skal hindre korttidsutleige, vart vedteke politisk på tampen av fjoråret og lyder som følgjer:

«Eigedomen skal nyttast til fast bustad og ikkje berre til korttidsutleige. Korttidsutleige utover 30 døgn årleg er ikkje tillate utan kommunen sitt samtykke. Med korttidsutleige meinast utleige i inntil 30 døgn samanhengande».

Stor økonomisk risiko

Nyleg vart dei første tomtene selde i Solvik og allereie er det kome ønskje frå ein av kjøparane om at dette vilkåret blir lempa på i ein periode. Førespurnaden gjeld ei av tomtene som er avsett til BBB (blokker/tett busetnad).

Søkjar ynskjer å bygge ut BBB3 i eitt byggesteg, noko som kan vere utfordrande økonomisk med tanke på å få selt om lag 20-25 bueiningar i ein avgrensa marknad. Søkjar er tydeleg på at føremålet med utbygginga er sal av leilegheitene, men dei vil sitje med ein stor økonomisk risiko fram til einingane er selde, og ynskjer fleksibilitet til kort- og langtidsutleige av einingar/bygg i ein tidsavgrensa periode, står det i saksutgreiinga til formannskapet.

Politikarane skal ta stilling til eventuell endring av vilkåret i kjøpskontrakta for den aktuelle tomta i møtet tysdag.

Kan drive langtidsutleige

I tilrådinga påpeikar administrasjonen at målet med vilkåret er ikkje å hindre all form for utleige, men å sikre at kommunale bustadfelt vert nytta i tråd med føremålet dei er etablerte for. Og ein står fritt til å drive med langtidsutleige.

Reglane om korttidsutleige er teke med for å sikre at tomtene skal nyttast til fast busetjing i trygge og føreseielege bumiljø, og å sikre eit tilbod til dei som treng å leige ei bueining for ein lengre periode, står det i saksutgreiinga, der tilrådinga er klar:

Stryn kommune som grunneigar endrar ikkje på vilkåret i punkt 11, sjølv om det er snakk om ein tidsavgrensa periode. Dersom ein lempar på vilkåret vil det skape forventning om same moglegheiter for andre. Korttidsutleige av eit visst omfang kan også vere i strid med reguleringsføremålet.

9. Varn og kloakk via ny pumpestasjon i Solvikt.

Publisert i Fjordingen 17/4-2026.

Av Av Gunnhild Sindre (gunnhild.sindre@fjordingen.no)

Den nye pumpestasjonen som er under bygging i Solvk. FOTO: Stryn kommune

I Loen er det fullt arbeid på fjorden. Her vert vassleidningar kopla på pumpestasjonen som er under bygging i Solvik.

Det er verksemda IMC Diving AS som er i arbeid i Lobukta. Dette er eit bergensbasert firma som tek på seg ulike former for arbeid under vatn. I Loen er dei på plass med arbeids-, dykke og ROV-fartøyet MS Alpha.

IMC held denne veka på med å kople sjøleidningar til pumpestasjonen, seier prosjektleiar i Stryn kommune Agathe Alsaker Hopland.

Tidelgare denne veka vart vassleidningane til Marsåvika og Ugla kappa og kopla på pumpestasjonen i Solvik, så vatnet dit vert no ruta via pumpestasjonen.

Tysdag var dei i Marsåvika og Ugla. Her var abonnentane difor utan vatn den perioden det vart kopla om, frå midt på dag til sekstida, seier Hopland.

Onsdag var det reservevassleidningen mellom Stryn og Loen som stod for tur. Også den skal rutast via pumpestasjonen i Solvik.

Vidare skal reservevassleidninga frå Loen forlengast til å gå via pumpestasjonen.

IMC koblar på alle vassleidningane som skal innom pumpestasjonen. Så skal dei også koble på ei avløpsleidning som skal forlengast inn til reinseanlegget i Solvik, seier prosjektleiaren.

Avløpet frå bustadfeltet skal via pumpestasjonen og inn til reinseanlegget i Loen, når den tid kjem.

IMC skal også gjere ein ROV-inspeksjon (Remote Operated Vehicle), der dei går over sjøleidningane med ein fjernstyrt undervassrobot.

Etter det får vi oppdaterte kartdata på kvar leidningane ligg i fjorden, seier Hopland, som legg til at det er spennande med slike prosjekt. Det er ikkje kvar dag ein har arbeid med sjøleidningar på fjorden.

Arbeidet med leidningane skal gå ut denne veka, og litt ut i neste. Etter det blir det arbeid med landtaket, påkoplinga i fjøra, som skal beskytte leidningane for ver og vind.

11. Tildeling av tomter i Solvik.
Desse vann «tomtelotteriet» i Solvik.

Publisert i Fjordingen 17/4-2026.

Av Roy Aron Myklebust (roy.aron.myklebust@fjordingen.no)

Dei første tomtene i Solvik har fått eigarar. FOTO: Bengt Flaten

Bustadtomtene i Solvik vart lagt ut for sal i byrjinga av april. Fleire tildelingar måtte avgjerast med loddtrekning.

Tomtene i det nye kommunale bustadfeltet i Solvik vart lyst ut for sal med salsstart 7. april klokka 12.00.

Sidan det var fleire som søkte på same tomt, med søknadstidspunkt kl. 12.00, har vi avgjort tildelinga med loddtrekking der søkjarane har same tomt på prioritet 1. Loddtrekkinga vart føreteke av Jan Flore, kommunalsjef samfunnsutvikling, med Margunn Teige Sunde, konsulent samfunnsutvikling, og Anita Elin Myklebust, avdelingsleiar kart og oppmåling, som vitner, skriv Stryn kommune i tildelingsbrevet som no har gått ut.

Loddtrekkinga er i tråd med tildelingsreglane til Stryn kommune vedteke av kommunestyret i desember i fjor:

Frittliggjande småhus:

«Dersom fleire søkjer på same tomta skal den først innkomne søknaden imøtekomast. Ved tvilstillfelle skal det nyttast loddtrekking».

Førebels er det gjort desse tildelingane av tomter til frittliggande småhus:

Tomt 12 tildelt Jana Stokova (ikkje loddtrekking, var einaste som hadde tomt 12 som prioritet 1)

Tomt 11 tildelt Marte Rønnestad og Frank Willy Bødal (avgjort ved loddtrekking mellom Marte Rønnestad/Frank Willy Bødal og Maria Alejandra Moen/Ivar Loen Sandbakk).

Tomt 13 tildelt Maria Alejandra Moen og Ivar Loen Sandbakk

Tomter til blokker/tett busetnad

Tomt BBB2 tildelt Loen skylift AS (ikkje loddtrekking, var einaste som hadde tomt BBB2 som prioritet 1).

Tomt BBB3 tildelt Jan Roger Opheim Oliversen (avgjort ved loddtrekking mellom Berre pluss AS, Step change AS og Jan Roger Opheim Oliversen.

Tomt BBB1 tildelt Step Change AS (ikkje loddtrekking hadde BBB1 som prioritet 2).

12. Konfirmantar i Loen 3/5-2026.
Utdrag frå konfirmantliste for heile kommuen.

Publisert i Fjordingen 24/4-2026.

Søndag 3. mai Loen

Elias Lyslo Kvamme

Dominik Královics

Lilly Tjugen Slaattelid

Noah Bruland Sandbakk

Rebecca Beinnes

Ulrik Fonn Grov

Villemo Brattaker Loen

13. Skal byggje nytt hotell i Loen.

Publisert i Fjordingen 5/5-2026.

Av Bengt Flaten (bengt.flaten@fjordingen.no)

Hotelldirektør Richard Grov t.v. og prosjektleiar for Loen Base, Endre Håberg ved stikka som markerer det søraustre hjørnet på det nye hotellet i Loen. FOTO: Bengt Flaten

Hotell med 49 rom, stort bakeri, restaurant og nye lokale for Loen Active. Det er kortversjonen av Loen Base som skal stå ferdig om to år.

Loen får sitt tredje hotell, midt mellom Alexandra og Loenfjord. Dermed er den store grusplassen i Loen sentrum snart historie.

Loen Base er namnet på det nye prosjektet som ikkje har nokon offisiell kostnadssum enno. Men som ifølgje hotelldirektør Richard Grov og prosjektleiar Endre Håberg vert ei stor investering. Meir vil dei ikkje seie, enno. Men store investeringar i Alexandra-målestokk handlar ikkje om prosjekt til nokre titals millionar. Grov røper at Loen Base vert det største prosjektet for Alexandra-konsernet, etter Loen Skylift. Prosjektet på Hoven kosta nærare 300 millionar kroner.

Namnet Loen Base er vald utfrå innhaldet i nybygget. B for bakeri, A for aktivitet, S for sove og E for ete.

Forklart meir i detalj, vil nybygget få eit bruksareal på 5.500 kvadratmeter fordelt på fire etasjar. Som startar med parkeringskjellar i underetasjen, ein første etasje med stort bakeri, restaurant og pub og nye lokaliter for Loen Active. Rett over Loen Active vert det og bygd nytt treningslokale. Hotelldelen med til saman 49 rom vert lagt til 2. og 3. etasje.

Kvifor byggje endå eit hotell i Loen?

Etter at Hotel Loenfjord vart bygd i 1996, har tomta mellom dei to hotella våre ligge der som ein stor grusplass. Og det er ikkje noko særleg. Då er det mykje betre å rive alt, for å gje plass til eit fint bygg som skaper utvikling og bidreg til eit betydeleg løft for Loen sentrum. Som del av byggjeprosjektet vil Loen få både ny sentrumsgate med parkering, belysning og beplantning. Og ordna busshaldeplass, seier Richard Grov.

Sporstøl Arkitekter har prosjektert nybygget, og i desse dagar vert siste hand lagt på byggjesøknaden.

Vi satsar på å vere igang med tilbodsprosessen før sommarferien, med håp og fokus på å få på plass lokale entreprenørar. Tentatitv framdriftsplan er byggjestart i oktober og ferdig prosjekt i mai 2028, seier Grov.

Han legg ikkje skjul på at dette er eit meir komplekst prosjekt enn berre å smelle opp eit nybygg på ein grusplass.

Vi skal djupt ned for å byggje parkeringskjellar. Då er utfordringa at vi kjem lågare enn vassoverflata på fjorden rett ved. Det vil vere både krevjande og kostbart. Kjellaren skal gje rom til 38 parkeringsplassar, pluss sykkelparkering og plass til vask og vedlikehald av syklar, seier Grov og Håberg. For referansen sin del, vil nedkøyringa til parkeringskjellaren kome omtrent der inngangsdøra til Loen Active er i dag.

Richard Grov fortel at hotelldelen i Loen Base vert eit rom- og frukostkonsept, der gjestane kan bestille rom på nett.

Det vil utfylle dei hotellkonsepta vi allereie har, og gjerne rette seg mot gjestar som samtidig søkjer aktivitet. Difor passar det fint at Loen Active med sine tilbod vert å finne i same bygget, i større og betre lokalitetar enn dagens.

Noko av det ekstra spennande er at nybygget og skal romme eit stort og moderne bakeri som ikkje berre skal tilby nybakte brød til gjestane på Loen Base, men levere ferske bakarvarer til alle hotella i Loen og til publikum både i Loen og utanfrå. Og som del av konseptet med å kunne ta i mot lunsjgrupper.

Vi er sikre på at Loen Base vil bli eit flott tilbod i Loen, som utfyller det vi allereie har, seier Richard Grov.

Kva med tal nye arbeidsplassar?

Etter at alt er bygd og har gitt god sysselsetjing i anleggsfasen, ser vi for oss 33 årsverk knytt til Loen Base, seier Richard Grov.

14. Loen skylift- pengemaskin i 2026.
Tente 52 øre pr. omsett krone.

Publisert i Fjordingen 5/5-2026.

Av Bengt Flaten (bengt.flaten@fjordingen.no)

Knut Roar Skåden, driftssjef Loen Skylift på terassen utanfor det nye møterommet på Hoven. FOTO: Bengt Flaten.

Loen Skylift er ein solid pengemaskin. 2026 vart nytt år med solide rekordar på alt: Besøkstal, omsetjing og utbyte til eigarane.

Skyliften opna med brask og bram i 2017. Sidan den gong har trafikken år etter går gått bokstaveleg talt til vers. Medan dei første antydningana handla om 40.000 besøkjande i året, kan styreleiar og dagleg leiar Richard Grov fortelje om 187.331 gjester i 2025. Ein auke på 5.590 frå året før.

Ja, det går særs bra. Og det mest gledelege er at dette er eit selskap med stor grad av lokal eigarskap. Det betyr at lokale eigarar får gode, årlege utbyte, seier Grov.

Tal gjester: 187.331 (181.741).
Omsetjing: 90.206.000 (83.055.000)
Resultat før skatt: 47.164.000 (36.199.000).

Resultatet på over 47 millionar kroner av ei omsetjing på 90,2 millionar, betyr at Loen Skylift tente 52 øre pr krone dei hadde i omsetjing. Det gav eigarane eit utbyte på 24.650.000 kroner i fjor. Utbytet er på 17 prosent av pålydande aksjekurs. Opp frå 13 prosent året før. Som og var rekord.

Eit felles holdningselskap eigd av Hotel Alexandra og Garaventa (leverandøren av pendelbana) er største eigaren i Loen Skylift med ein samla aksjepost på 65 prosent. Alexandra sin aksjepost er på 40 prosent. Det betyr at hotellet hentar ut nær 10 millionar kroner i utbyte frå Loen Skylift i 2025.

2,8 mill til Stryn kommune

Nest største eigar er Stryn kommmune med ein eigardel på 11,4 prosent. Kommunen sitt utbyte for 2025 er på godt og vel 2,8 millionar kroner. Dermed gir kommunen si investering i skyliften for ti år sidan eit kjærkome utbyte i form av frie inntekter.

Det oppsiktsvekkjande, på papiret, er at resultat før skatt for Loen Skylift gjekk opp med heile 11 millionar kroner frå 2024 til 2025, medan omsetjinga auka med «berre» 7 millionar.

Årsaka til det er at vi på slutten av 2023 og starten på 2024 gjennomførte eit stort og kostbart vedlikehaldsprogram der vi demonterte og gjennomlyste alt. Slikt kostar, men er ein viktig del av sikkerheita ved eit slikt anlegg. Så betydeleg forbetra resultat i fjor er resultat av høgare gjennomsnittsprisar på billettane og lågare kostnader, forklarer Grov.

Investerte 21 mill.

Loen Skylift brukte og pengar i fjor.

Totale investeringar var på 21 millionar kroner, alt levert av lokale entreprenørar. Blant anna på eit påbygg på fjellet som kombinerer møterom for opptil 25 personar og betydeleg betre ordna returkø til gondolen. Og ikkje minst eit gråvassanlegg med betydeleg høgare kapasitet enn det vi hadde frå starten av. Vi har og arbeidd med vedlikehald av stinettet og jobba med ny reguleringsplan for Hoven. Den siste med tanke på nye utviklingsprosjekt der stikkorda er fjellbutikk, fjellhytte på Skredfjellet og tilrettelegging for endå betre oppleving av utsikta. Arbeidet med reguleringsplan og utviklingsplanane våre skjer i tett dialog og samarbeid med Loen Sameige, som er grunneigarane av fjellområdet, seier Grov.

15. Nei til å endre vilkår om korttidsutleige i Solvik..

Publisert i Fjordingen 5/5-2026.

Av Roy Aron Myklebust (roy.aron.myklebust@fjordingen.no)

Solvik bustadfelt ved Loen. FOTO: Bengt Flaten

Formannskapet støtta fullt og heilt tilrådinga, i saka der ein tomtekjøpar i Solvik ønskte å få endra vilkåret knytt til korttidsutleige.

Eg frykta dette ville kome. Vi bør sikre at vilkåra vi set blir gjeldande, og dette er ikkje OK, slo Haldor Hove (Ap) fast i formannskapsmøtet tysdag.

Førespurnaden om mellombels lemping av vilkår knytt til korttidsutleige gjaldt BBB3, som er ei av tomtene som er avsett til blokker/tett busetnad.

Stryn kommune som grunneigar endrar ikkje på vilkåret i punkt 11, sjølv om det er snakk om ein tidsavgrensa periode. Dersom ein lempar på vilkåret vil det skape forventning om same moglegheiter for andre. Korttidsutleige av eit visst omfang kan også vere i strid med reguleringsføremålet, heitte det i saksutgreiinga.

Hove og resten av formannskapet stilte seg bak kommuneadministrasjonen si tilråding.

16. Hyttesak til debatt..
Fleire tvilte seg til konklusjon

Publisert i Fjordingen 5/5-2026.

Av Roy Aron Myklebust (roy.aron.myklebust@fjordingen.no)

Stine Rake (t.h.) forklarar planane til medlemmane av formannskapet. Utleigeeiningane vil ha ein bringebærhage som næraste nabo i aust og eit bustadhus i nord. Naboen har ikkje klaga på tiltaket og var også med på synfaringa. FOTO: Bengt Flaten

Søknaden om hyttebygging på eit område regulert til bustader på Rake fekk administrativt avslag. Tysdag skulle politikarane gjere opp si meining.

Før møtet var formannskapsmedlemmane på synfaring der utleigeeiningane er tenkt etablert. Tiltakshavar Stine Rake fortalde at ho ønskjer fleire føter å stå på, etter at ho tok over garden. Å drive som fruktbonde har gjeve lite inntekter dei siste åra.

Det er dei sjølve som har regulert det aktuelle arealet til bustadføremål, med tanke om å byggje der sjølve. Sidan dei har skaffa seg husvære på nabotomta til garden er ikkje dette lenger aktuelt, og difor vil dei heller nytte området til utleigehytter.

Kommunen har i avslaget lagt til grunn at det er knytt ulike behov- og bruksmønster for heilårsbustadar og utleigeeiningar. Sjølv om det ikkje er kome inn nabomerknadar til tiltaket, legg kommunen likevel vekt på at eigartilhøva på staden kan vere skiftande og det kan kome til nye eigarar som har lite forståing for ein slik arealbruk.

Erfaringsmessig er kommunen kjent med at kombinasjonen av heilårsbustadar og utleigeeiningar kan føre til nabokonflikt, heiter det blant anna i saksutgreiinga.

Fryktar presedens

Då saka vart diskutert i formannskapsmøtet seinare på dag, meinte Sonja Øvre-Flo (H) at det var svært positivt at ein ny generasjon var motivert for drive gardsbruket vidare, og såg at hyttene kan styrke driftsgrunnlaget.

Eg vil få denne gjennom, sa Øvre-Flo.

Haldor Hove (Ap) var meir skeptisk. Både av omsyn til forventa innstilling frå Statsforvaltaren, men også at saka kan skape presedens.

Eg er redd at det i andre bustadfelt vil vere andre som vil setje opp noko lite til utleige, og då utarma vi det som er regulert, sa Hove, som såg administrasjonen sitt poeng med å skilje klart mellom tomter for faste bustader og tomter for utleigeeiningar.

Endringsframlegg frå Høgre

Ellen Hilde Hauge og Høgre fremja endringsframlegg, der ein la vekt på at tiltaket er plassert på allereie regulert areal, at det ikkje kjem i konflikt med dyrka mark og heller ikkje føreligg naboklager.

Det vart også peika på at utleige til turistar historisk har vore ei viktig tilleggsnæring for gardane i Stryn kommune, og støttar opp under kommuneplanen sin samfunnsdel som legg vekt på levande bygder og verdiskaping basert på lokale ressursar og utvikling av berekraftige næringar.

Bygging på pålar

Silje Skarstein (Sp) og Jan Træen (Ap) støtta begge framlegget, men meinte det kunne styrke vedtaket i høve Statsforvaltar, viss ein fekk med at utleigeeiningane kan nyttast til bustad for sesongarbeidarar på garden.

Då knyter vi det opp mot drifta på garden og kanskje vert det lettare å få godkjent, kommenterte Skarstein.

Eit anna forhold som hadde kome fram under synfaringa, var at tiltakshavar vil byggje hyttene på pålar, slik at desse blir flyttbare og tiltaket såleis er reversibelt. Då hindrar ein heller ikkje at det kan kome faste bustader i framtida.

Tvilt seg positiv

Rune Myklebust (Sp) sa at også han fryktar presedens, men hadde tvilt seg fram til å støtte Høgre sitt framlegg. Etter diskusjonen og nye innspel var også Haldor Hove på glid.

Men vi må ha med at det skal vere reversibelt, understreka Hove, som også meinte det var eit viktig poeng at området er regulert i privat regi.

Med formuleringar om at utleigeeiningane skal byggjast på pålar, og at hyttene også kan fungere som bustad til sesongarbeidarar på garden, vart endringsframlegget samrøystes vedteke.

17. Gamle Oppheimsvegen vert truleg privat bomveg.

Publisert i Fjordingen 12/5-2026.

Av Roger Due-Oldeide(roger.oldeide@fjordingen.no)

Oppheimsvegen er ikkje lenger skilta som veg til Oppheim frå fv 60. No vert dette truleg privat veg, stengd med bom. FOTO: Bengt Flaten

Mot Rake Grendalag sitt ønskje, vert Oppheimsvegen truleg omgjort til privat veg frå 1. august.

Tok ikkje klaga til følgje:

Kommunestyret gjorde i sak KS-017/25 vedtak om at ein parsell av Oppheimsvegen frå Fv. 60 til krysset mot Marsåvegen skulle nedklassifiserast til privat veg når den nye kommunale veg mellom Solvik og Leitekvia vert opna. Den nye vegen vart opna i november, og kommunen ønskjer å nedklassifisere den gamle vegen frå 1. august.

Bakgrunnen for nedklassifiseringsvedtaket var at eksisterande veg er smal, bratt og har avgrensa møteplassar, samt at avkøyrsla frå Fv. 60 ikkje tilfredsstiller dagens krav til vegstandard.

Klage frå grendalaget

Rake Grendalag har sidan søkt om oppheving vedtaket. M.a. peikar grendalaget på at den eksisterande Oppheimsvegen er viktig som alternativ tilkomstveg ved ulukker og beredskapssituasjonar. Grendalaget oppmodar kommunen om å prioritere bygging av ny veg så raskt som mogleg for å sikre trygg ferdsel og betre tilhøve for eksisterande og framtidige innbyggjarar i området.

Kommunen argumenterer for at det ikkje er føremålstenleg å oppretthalde to kommunale vegsamband i same området, men poengterer at mjuke trafikantar framleis kan nytte den nedklassifiserte vegparsellen, men at parsellen vert stengd for køyrande med bom, orienterte avdelingsleiar for kommunalteknikk Sigurd Muldsvor då saka vart handsama av utvalet for samfunnsutvikling.

Ønskjer privat veg med bom

Politikarane diskuterte mest korleis vegen kan stengast av og plassering av ein bom som kan nyttast av dei som bur ved vegen. Også eit innkøyring forbode-skilt vart foreslått.

Rolf Olav Tenden (H) meinte at innkøyrselen uansett må snevrast inn, slik at vegfarande ikkje køyrer seg inn på denne vegen. Til dømes har det vore eit problem at turistar køyrer seg inn på denne bratte vegen.

Utvalet vedtok samrøystes følgande tilråding frå kommunedirektøren;

Stryn kommune held fast ved vedtaket om nedklassifisering av parsell av Oppheimsvegen. Parsell av Oppheimsvegen frå Fv. 60 til krysset mot Marsåvegen vert lagd ned til privat veg. Stryn kommune skal vere grunneigar av nedlagd vegparsell. Stryn kommune skal synfare vegen og utbetre naudsynte manglar. Stryn kommune skal etablere bom på nedlagd vegparsell i samråd med oppsitjarane til vegen. Parsell av Oppheimsvegen er å rekne som privat veg frå og med 01.08.2026.

Saka skal også opp for formannskapet og kommunestyret.

18. Jens Hogrening på sykurs.
Viktig å være sjølvhjelpt

Publisert i Fjordingen 19/5-2026.

Av Gunnhild Sindre(gunnhild.sindre@fjordingen.no)

Kjekt å vere sjølvhjelpt, seier Jens Hogrenning, som for første gong sette seg til symaskina. FOTO: GIU

Kjekt kurs som gav masse inspirasjon. Dette er konklusjonen etter symaskin/redesign-kurset i Gamle Innvik Ullvarefabrikk. – Kjekt å vere sjølvhjelpt, seier Jens Hogrenning, som prøvde seg på symaskin for første gong.

Jens Hogrenning nyttar ordet «fortreffeleg» når han får spørsmål om korleis han har hatt det på kurset.

Dette var ein fryd å vere med på. No er eg blitt åleine og har berre flytta rundt på symaskina. Denne helga lærte eg meg korleis ei symaskin verka, slik at eg kan klare meg sjølv. Legge opp bukser og slike ting, seier han.

Eg hadde aldri prøvd å sy på symaskin før, men tykkjer det er viktig å vere sjølvhjelpt. Nei, dette var verkeleg kjekt, eg anbefaler alle å vere med på ei slikt kurs om dei får høve.

Ulike teknikkar

Kjekt kurs som gav masse inspirasjon. Håpar det blir nytt kurs snart, seier ein av deltakarane, Eva Bøe, ifølgje ei pressemelding frå stiftinga.

Veldig bra lokale å ha kurs i. Begge damene var flinke og kunne svare på alt vi lurte på. Dei to det vert refererer til er Anndi Bergset frå Gjensyn Systove, som hadde ansvar for kurset saman med Revling Holm.

Ei veldig kjekk helg med engasjerte og kjekke deltakarar som verkeleg hadde lyst å lære. Hektisk og full fart heile helga, seier Anndi Bergset.

Fleire ulike kurs

Vi la opp til at deltakarane skulle få lære seg ulike teknikkar. Sy seg ei enkel veske, men også ha eit valfritt prosjekt innan redesign. Her kunne dei velje å sy seg kjole, forkle, bukse, bluse eller ein veskesekk.

Deltakarane jobba med tekstilar dei hadde med seg sjølve. Dessutan bidrog også Innvik AS med tekstilar til kurset.

Kurset var ein del av kursrekkja som Gamle Innvik Ullvarefabrikk har hatt i løpet av vinteren og våren med støtte frå Gjensidigestiftelsen og Vestland Fylkeskommune. Til saman har 40 personar vore på kurs i keramikk, veving og no symaskin/redesign.

19. Oppheimsvegen.
Meiner skilting er løysinga.

Publisert i Fjordingen 22/5-2026.

Av Roy Aron Myklebust (roy.aron.myklebust@fjordingen.no)

Leiar i Rake Grendelag, Kari Samuelsen Nesdal, og nabo Alf Rake likar dårleg planane om privatisering og bom for den første delen av Oppheimsvegen. Dei meiner skilting her oppe i krysset ved Leitekvia, vil løyse utfordringane som den smale og bratte parsellen lengst nede representerer . FOTO: Roy Aron Myklebust.

Kari Samuelsen Nesdal og Alf Rake ber politikarane droppe bom, og meiner god og riktig skilting vil løyse utfordringane på den 500 meter lange strekninga av Oppheimsvegen som er føreslege privatisert.

Utval for samfunnsutvikling vedtok tidlegare i mai å nedklassifisere første del av Oppheimsvegen til privat veg. Dette gjeld strekninga frå fylkesvegen og opp til krysset ved Marsåvegen, omlag 500 meter.

Vedtaket seier vidare at det skal setjast opp bom i samråd med oppsitjarane. Mjuke trafikantar skal framleis kunne nytte strekninga, og sjølv om den vert nedklassifisert skal kommunen vere grunneigar og syte for synfaring og at manglar blir utbetra.

Ein viktig grunn til at kommunen ønskjer å gjere dette, er at den aktuelle vegstrekninga er svært smal og bratt - og med avgrensa møteplassar, og det no er kome ny veg frå Solvik som koplar seg på Oppheimsvegen ved Leitekvia.

Ikkje sjans

Leiar i Rake Grendelag, Kari Samuelsen Nesdal, og nabo, Alf Rake, likar dårleg det som er i ferd med å skje. Dei meiner ei stenging av vegen er uheldig for innbyggjarane lengst nede på Rake. Ikkje berre blir det ein lang omveg, det blir også svært krevjande å ta seg oppover bakkane vinterstid, når dei må via Leitekvia i staden for å køyre rett ned på fylkesvegen.

Garden lengst nede har ein 180 graders sving, og dei har ikkje sjans til å kome seg oppover der vinterstid. Det er ikkje snakk om. Så no lurer han på om han må bygge seg ny veg sjølv, for å kome seg opp. Det høyrest litt voldsamt ut, seier Rake.

Etterlyser skilt

Trafikkutfordringane langs den bratte og smale strekninga meiner dei kan løysast mykje enklare, enn nedklassifisering og stenging med bom. Nesdal og Rake har meir tru på skilting som styrer trafikken der den skal, og som avgrensar bruken på den utsette strekninga til kun dei som bur der.

No står vi midt i krysset på Leitekvia men det er ingen skilt som seier noko om kvar du skal køyre for å kome til Skoglivegen, Marsåvegen, Leite eller Oppheim, seier Nesdal, og slår ut med armane. Ho etterlyser skilta som kommunen skulle sette opp for snart eitt år sidan.

Ein konsekvens av manglande skilting ved krysset på Leite, er i følgje Rake, at mange av dei som skal til Oppheim køyrer rett fram og hamnar i bustadfeltet i Skoglivegen i staden.

Gjennomkøyring forbode

Også skilting ned att til fylkesvegen manglar i dette krysset. Etter at nyevegen kom, og Oppheimsskiltet omsider vart flytta dit, opplever dei at trafikken oppover på gamlevegen har avteke. Men ned att hamnar dei fleste på denne, fordi det følast meir naturleg enn å svinge av ved Leitekvia.

I tillegg til nemnde skilting ønskjer Rake Grendelag eit «gjennomkøyring forbode»-skilt nede ved fylkesvegen og oppe ved krysset på Leite. Men at køyring til eigedomane er tillate.

Vi ser ikkje poenget med å få opp ein bom. Alle vi som bur her veit kvar ein må stoppe og kvar møtelommene er, seier Nesdal, og gjentek at utfordringa er når framande skal ta seg fram – og då særleg på vintervegar.

Ber om utsetjing

Dei reagerer elles på at det har vore lite informasjon til innbyggjarane på Rake i denne saka. Så vidt dei veit har ikkje ein gong grunneigarane på den aktuelle parsellen vore kontakta.

Det har ikkje vore sagt noko til oss som har bygd nedanfor Leite, eller dei som har overteke gardane utover Marså, at den gamle vegen skal fysisk stengast ved ny veg.

Dei håpar i første omgang ei utsetjing av saka, som etter planen skulle opp i formannskapet torsdag. Deretter at grepa med skilting kan prøvast ut før ein eventuell bom blir realisert.

19. Oppheimsvegen.
Nedklasssifisering og stenging utsatt. For mange uavklarte forhold.

Publisert i Fjordingen 27/5-2026.

Av Roy Aron Myklebust (roy.aron.myklebust@fjordingen.no)

Dersom ein ikkje lenger skal kunne køyre nedover til fylkesvegen frå den nedste garden, blir det krevjande å ta seg oppover -særleg vinterstid. Då må ein ta ein 180 grader sving. FOTO: Roy Aron B. Myklebust

Privatisering av nedste del av Oppheimsvegen stod på saklista til formannskapet torsdag. Politikarane meiner derimot at det er for mange uavklarte forhold til at dei kan ta ei avgjerd.

Utval for samfunnsutvikling si tilråding var å gjere første 500 meter av Oppheimsvegen privat, og fysisk stenging med bom for å hindre bruk av parsellen.

Formannskapet peika i si handsaming på fleire forhold som bør avklarast, før dei er komfortable med å gjere vedtak i saka.

Formannskapet meiner det ligg føre fleire uavklarte forhold knytt til heilårstilkomst, trafikksikkerheit, beredskap, ansvarstilhøve og konsekvensar for dei berørte eigedomane. Før det kan fattast endeleg vedtak om privatisering av vegparsellen, må kommunen gjennomføre nærare vurderingar, heiter det i endringsframlegget, fremja av Ellen Hilde Hauge (H). Ho synte også til brev frå oppsitjarane sendt til kommunen i januar i år.

Sjå i samanheng med pågåande prosess

Silje Skarstein (Sp) var samd i forslaget, og meiner det også vil vere naturleg å sjå denne saka i samanheng med den pågåande prosessen om nedklassifisering av kommunale vegar.

Partikollega Rune Myklebust meinte det hadde lege i korta, at med ny veg frå Solvik så ville ein nedklassifisere den gamle.

Men eg føler det er litt mange lause trådar, la Myklebust til, som støtta ei utsetjing for nærare vurderingar i saka.

Jan Træen (Ap) var også samd i utsetjingsframlegget. Han synte til konsekvensane ei privatisering og stenging av vegen kan få, blant anna for eigarane av garden lengst nede. Der blir det ein 180 grader sving for å kome seg opp til nyevegen, og Træen meiner dette vil krevje eit større arbeid med muring.

Det vil vere store kostnader, påpeika han, og meinte ei avklaring om kommunen skal bidra lyt vurderast dersom parsellen vert stengt.

Ber om avklaringar

I utsetjingsframlegget, som vart samrøystes vedteke, blir kommunedirektøren beden om å kome tilbake med saka der følgjande seks forhold vert vurdert og avklart:

1. Heilårstilkomst:- Vurdere om eigedomane gnr. 82 bnr. 1, 18 og 27 har reell og forsvarleg heilårstilkomst via Solvikvegen.

2. Beredskap og samfunnstryggleik:- Vurdere konsekvensar for beredskap, utrykking og naudetatar dersom Oppheimsvegen vert heilt stengd for køyrande.

3. Ansvar for drift og vedlikehald:- Klargjere framtidig ansvar for brøyting, strøing, vedlikehald, overvasshandtering og teknisk infrastruktur.- Vurdere om det er rimeleg og forholdsmessig å overføre driftsansvar til eit avgrensa tal private brukarar.

4. Trafikksikkerheit for mjuke trafikantar- Vurdere konsekvensar for skuleborn som brukar denne vegen som skuleveg.

5. Tidlegare offentlege føringar og vedtak- Korleis er dette vedtaket ifht reguleringsføresegnene til Rake, samt vedtak frå landbrukskontoret (saksdokument datert 18.05.83, der det står at eksisterande gardsbruk også i framtida skal nytte Oppheimsvegen som tilkomst).

6. Behov for fysiske utbetringar- Vurdere behov og kostnader for utbetring av tilkomst frå eigedomane opp til Solvikvegen dersom denne skal vere hovudtilkomst.

Tilleggspunkt:
Ein skal sjå saka i samanheng med pågåande prossess for nedklassifisering av kommunale vegar.

21. Fredagsprat nr 370. Maria.
Maria Opheim Drageset frå Loen bur og arbeider i Oslo

Publisert i Fjordingen 5/6-2026.

Av Thomas Thule (thomas.thaule@fjordingen.no)

Maria Opheim Drageset. Frå Loen bur og arbeider i Oslo. Fredagsprat nr 370. FOTO: Privat

Rett timing og litt mindre regn hadde ikkje skada

Kva opptek Maria Opheim Drageset for tida?

For tida er eg oppteken med alt frå hårfargar og nye trendar i Oslo til å nyte fine dagar heime i Loen. Elles går det mykje i familie, vener og å finne på kjekke ting når eg har fri.

Kvifor flytta du frå Nordfjord?

Eg flytta på grunn av at eg fekk eit jobbtilbod eg ikkje kunne takke nei til, og eg fekk sjansen til å utfordre meg sjølv og få nye erfaringar.

Kva skal til for at du kjem tilbake?

Rett timing. Loen er heime for meg så det er absolutt ein moglegheit. Men litt mindre regn enn vanleg hadde ikkje skada.

Les du Fjordingen?

Eg les Fjordingen ein sjeldan gong når eg er heime på ferie, i papirform vel og merke.

Er det noko lokalavisa gjerne kan skrive meir om?

Eg synst det er bra at det blir skrive om unge som flyttar til/frå Nordfjord, men kanskje gje endå meir spalteplass til unge som startar bedrifter eller skapar noko nytt, og om kvardagsmenneska i Nordfjord. Det er ofte dei små historiene om engasjerte menneske, frivillige og lokale initiativ som er dei mest interessante.

Kva ville du gjort dersom du var ordførar for ein dag?

Viss eg var ordførar for ein dag ville eg tatt ein runde i kommunen og besøkt skular, sjukeheimar og lokale bedrifter, og notert ned alt som folk meiner burde fiksast. Stryn er ein fantastisk kommune å bu i, men det er alltid ting som kan bli betre. Eg ville særleg sett på korleis vi kan gjere det endå meir attraktivt for unge å bli buande eller flytte heim att etter utdanning. Til dømes fleire bustader.

Har du eit godt ferietips?

Siófok i Ungarn, eller Siargao og Boracay på Filippinane.

Kva ville du vist fram i Nordfjord til gode vener?

Du får 100.000 kroner som du kan gje til ein frivillig organisasjon. Kva for ein, og kvifor?

Eg ville gitt 100.000 kr til Mental Helse. Dei gjer eit viktig arbeid for psykisk helse, både gjennom lågterskeltilbod, hjelpetelefonar og ved å jobbe for meir openheit rundt psykiske utfordringar. Dette er noko som råkar mange, også i mindre lokalsamfunn som Stryn og Nordfjord.

Trenar du, i tilfelle kva?

Nei, ikkje akkurat no. Men eg spelte fotball frå eg var 6 år til eg var 23 år. No går eg berre turar i nærområdet.

Kva ser du helst på TV?

På TV ser eg helst på fotball, thriller-seriar, eller danske krim-seriar.

Kva er ditt forhold til sosiale media?

Det er ein stor del av kvardagen til mange, inkludert meg sjølv. Det er nyttig for å halde kontakten med folk, og for å få ut informasjon raskt, men det kan òg skape mykje støy, unødvendig samanlikning og press som kan påverke den mentale helsa. Eg meiner det handlar mykje om korleis ein brukar det, og at bevisst bruk er viktig for å unngå at det tek for mykje plass i kvardagen.

Korleis ser ei perfekt helg ut for deg?

Ei perfekt helg for meg er ei god blanding av ro og aktivitet. Tid til å slappe av og hente seg inn igjen, gjerne med gode måltid og litt sosialt samvær med familie eller vener. Samtidig er det fint å kome seg ut, få frisk luft og gjere noko som bryt litt med kvardagen. Balanse mellom det enkle og det sosiale er det viktigaste.

Kven får di helsing gjennom lokalavisa?

Eg vil gjerne helse til besteforeldra mine: Lise og Johannes Opheim, og Margun og Bjørn Drageset.

22. Jan Heggheim forlengar åremål med 2 år.

Styret i Musea i Sogn og Fjordane forlengar administrerande direktør Jan Heggheim sitt seksårige åremål med to år. Det kjem fram i ei pressemelding frå Musea i Sogn og Fjordane.

Publisert i Fjordingen 26/6-2026.

Av Thomas Thauley (thomas.thaule@fjordingen.no)

Styret i Musea i Sogn og Fjordane, med administrerande direktør Jan Heggheim til venstre, Therese Nesset, Knut Arve Helle, Siri Sandvik, Ivar Kvalen, Rune Hegrenes, Gunhild Berge Stang – på besøk i fellsmagasinet Tinghuset. FOTO: Henning A. Hellebust, Musea i Sogn og Fjordane

Vi i styret er godt nøgd med jobben Jan Heggheim har gjort som administrerande direktør så langt. No står vi i ein del prosessar som det er viktig å fullføre, og det er greitt at han held i det, seier styreleiar Ivar Kvalen.

Åremålet for direktørstillinga er på seks år, og går etter planen ut sommaren 2027. Dette er forlenga med to år, til sommaren 2029. Styreleiaren rosar direktøren for innsatsen dei første fem åra.

Han har vore ei samlande kraft for å få avdelingane under ei fane i Musea i Sogn og Fjordane, noko eg meinte var viktig å få til. Så har han fullført nokre av dei største prosjekta i museet si historie: Holvikejekta har fått verne- og formidlingsbygg og fellesmagasinet Tinghuset har blitt realisert i Angedalen i Førde. Sistnemnde er eit prosjekt i 100-millionar-klassen. Jan har gjort ein god jobb.

Store utfordringar i vente

Styreleiaren peikar på at finansieringa i museumsbransjen er utfordrande. Ein konsekvens er stort etterslep i vedlikehald på både driftsbygningar og antikvariske bygningar. Arbeidet med å få løfta Kystmuseet i Sogn og Fjordane, med akutte behov for oppgradering grunna manglande vedlikehald, er i gong. Også De Heibergske Samlinger – Sogn Folkemuseum har store bygnadsbehov som ein har byrja planlegginga av.

Det blir høg aktivitet framover også. Heggheim har eit stort nettverk som er viktig for oss i desse framtidige planane, seier Kvalen.

Eg har rett og slett draumejobben, både med tanke på at oppdraget er meiningsfullt, og at vi har eit godt lag til å løyse det, svarar Jan Heggheim på kvifor han ønskjer å halde fram.

Kva er eit godt museum?

Musea i Sogn og Fjordane får nye utfordringar etter kvart som verdssituasjonen endrar seg, og dei neste åra kjem til å krevje anna av oss enn det vi har opplevd siste åra. Eit stikkord er å ta KI meir i bruk, samtidig som ein skal vere kritisk og drive kvalitetssikring. Eg har lyst til å førebu MiSF på endringane, gjennom strategiarbeid og auka merksemd mot kva som er «eit godt museum» for samfunnet, gjesten og den tilsette. Musea i Sogn og Fjordane driv gode museum som kan bli endå betre. Vi må dessutan ta nokre «djerve val» med tanke på kva vi skal prioritere. Desse vala må vere godt forankra i organisasjonen, seier Heggheim.

23. Catrin Sanden til biologiolympiaden.
Eg er litt smånervøs.

Laurdag reiser Catrin Sanden til Litauen for å delta på den internasjonale biologiolympiaden.

Publisert i Fjordingen 10/6-2026.

Av Nina Flo Håvik (nina.havik@fjordingen.no)

Catrin Sanden frå Rake skal delta på den internasjonale biologiolympiaden i Litauen frå 12. til 19. juli. FOTO: Mina Flo Håvik

Frå 12. til 19. juli er det duka for den internasjonale biologiolympiaden i Vilnius, Litauen. Dit skal Catrin Sanden etter at ho kvalifiserte seg vidare etter den nasjonale olympiaden i vår.

Eg er fornøgd med at eg er komen så langt. No skal eg nyte opplevinga, seier Sanden.

I forkant har ho vore med på ei treningsveke på Universitetet i Oslo, der deltakarane fekk øve på praktiske oppgåver.

Vi fekk eit lite innblikk i kva som kan kome. På olympiaden kjem vi til å få både teoretiske og praktiske oppgåver, som vi har hatt to øvingsveker for.

Sjølv har Sanden sett på eldre oppgåver som har kome før.

Eg er litt smånervøs. Det ser ut som vanskegrada er eit hakk opp frå den nasjonale konkurransen.

Over 80 land sender deltakarar til arrangementet. Under prøvene kan dei ulike deltakarane samle poeng, som til slutt blir plussa saman. Etter det bestemmer summen om dei kan få ein medalje av varierande grad.

Etter å ha sett vanskenivået så er eg usikker på kva eg skal satse på. Det er også tidspress inn i bildet, og det er første gong eg skal konkurrere med praktiske oppgåver.

Uansett er Sanden innstilt på å ha ei fin veke.

Det skal vere mykje sosialt og eg kjem til å få sjå byen. Eg har heller aldri vore i Litauen før.

24. Lodalen treng ein veg for framtida.

Publisert i Fjordingen 21/7-2026.

Debattinnlegg av
Pål Henning Myren, Helset Lodalen.

Stor trafikk i Lodalen i midten av juli.

Lodalen er ei av dei største turistperlene i Noreg.

Kvar sommar kjem titusenvis av besøkande for å oppleve den storslåtte naturen, lovatnet og den unike historia dalen vår har å by på. Dette er positivt både for reiselivet og for regionen, men infrastrukturen har ikkje halde tritt med utviklinga.

Vegstandarden i Lodalen er i dag langt frå tilfredsstillande. I høgsesongen opplever vi enorme mengder trafikk med turistbussar, bubilar, campingvogner, personbilar og syklister. Resultatet er lange køar og trafikkork på ein veg som i utgangspunktet er smal og dårleg tilpassa dagens trafikkmengde.

Dette går utover både turistane og lokalbefolkninga. For turistane blir opplevinga prega av frustrasjon, venting og trafikale problem framfor den naturopplevinga dei har reist hit for. For oss som bur her, er dette ein del av kvardagen gjennom store delar av sommaren. Mange må planleggje dagen etter trafikken, og heilt enkle ærend kan ta unødvendig lang tid.

Endå meir alvorleg er konsekvensane dette har for beredskapen. Vi treng ikkje gå lenger tilbake enn to veker, då mannskap rykte ut til ei ATV-ulykke og samtidig møtte utfordringar på grunn av ein bil som hadde køyrt i grøfta. Framkomelegheita vart redusert, og det oppstod problem med å passere. I ein akutt situasjon kan minutt vere avgjerande.

Det er heller ikkje uvanleg at lokale innbyggjarar må trå til for å dirigere trafikken når uhell skjer i Lodalen, eller når det korker seg. Dette er ikkje ei haldbar løysing. Ansvar for trygg og framkomeleg ferdsel ligg hos vegeigaren.

Difor må fylkeskommunen ta situasjonen på alvor. Vegstandarden i Lodalen må betrast, og det må etablerast fleire løysinger slik at trafikken kan flyte betre og tryggare. Særleg strekninga med Hamrane peikar seg ut som kritisk. Her er vegen spesielt utfordrande, og behovet for tiltak er stort.

Lodalen er ikkje lenger ein liten sideveg med avgrensa trafikk. Dalen er blitt ein internasjonal turistdestinasjon, men vegen er framleis dimensjonert for ei heilt anna tid. Når turistnæringa skaper store verdiar for regionen, må det òg investerast i infrastrukturen som gjer denne verdiskapinga mogleg.

Vi kan ikkje vente til den dagen ein alvorleg hending får endå meir dramatiske konsekvensar fordi naudetatane ikkje kjem fram i tide.

No er tida inne for handling. Fylkeskommunen må prioritere Lodalen og sørgje for ein tryggare og meir framtidsretta veg – både for dei som bur her, dei som arbeider her, og dei mange som kvart år kjem for å oppleve ein av dei vakraste dalane i landet.

Pål Henning Myren
Helset, Lodalen

25. Trafikkaos skaper trøbbel.

Reportasje frå Lodalen.

Publisert i Fjordingen 21/7-2026.

Av Sigrid Heggestad (sigrid.heggestad@fjordingen.no)

Bom stopp i lang kø like ved Loenvatn Feriesenter i Lodalen torsdag ettermiddag. To ATV-ar på tur bestemte seg for å snu midt i køen, og køyre tilbake. FOTO: Sigrid Heggestad

Saktegåande køar og daglege trafikkorkar er situasjonen i Lodalen for tida. Dette skaper utfordringar for bygdefolk, næringsdrivande, turistar og naudetatar.

Dei siste dagane har Fjordingen fått fleire tips om den store sommartrafikken oppover dalane.

Både i Lodalen og Oldedalen er det trafikkorkar og køar langs smale vegar.

Fleire fortel om at dette fører til farlege situasjonar og uønskte hendingar langs vegane.

Torsdag ettermiddag kokte det i Lodalen med masse turistar, 27 grader og steikande sol.

Svært mange køyretøy snirkla seg oppover og nedover det populære dalføret.

På vegen var det motorsyklar, bilar, bubilar, campingvogner, ATV-ar, bussar, gåande, syklande og sparkesyklar.

Tolmod i høgsesongen

Det er veldig flott her i Lodalen, men akkurat no i høgsesongen blir det litt masse trafikk, ja, fortalde Ester og ei venninne som sat utanfor bubilen sin ved Loenvatn Feriesenter.

Dei hadde parkert bubilen like ved vegen, medan straumen av bilar passerte tett forbi.

Svenskane har vore i Lodalen og Vestlandet kvar sommar siste åra, i midten av juli, når dei fleste har ferie. Då må ein smørje seg med tolmod når så mange trafikantar er ute på vegane samstundes.

Tidleg kantslått og betre sikt

Fjordingen har spurt leiar i Loen utviklingslag, Vegard Rake Midtun, om kva dei synest om trafikksituasjonen.

Han har vore i kontakt med fleire av campingplassane, som alle fortel om store utfordringar. Ønsket er tunnel gjennom Hamrane og utbetringar på dei verste vegpartia. Utviklingslaget har fleire forslag til enkle og raske tiltak som kan hjelpe litt på trafikkbildet.

Vi har i fleire år etterlyst dette med kantslått. Det blir slått, men dei kjem for seint i gang. No er det ikkje slått og høgt gras står i kantane. Mange ser dermed ikkje kantane, og tør ikkje å legge seg lenger ut. Dette er eit enkelt tiltak, berre dei får det gjort. Eitt år vart det ikkje slått før i august, seier Rake Midtun.

Han fortel at for nokre år sidan fekk dei gjennomslag for å få til betre siktlinje i svingane. Her er det potensial for å gjere endå meir, slik at det blir enklare å planlegge køyringa. Då kan bilane stoppe tidsnok, så ein slepp å rygge og skape stans i trafikken.

Fleire møteplassar og skilting

Det vart også laga til fleire møteplassar for nokre år sidan, men det er framleis behov for større og nye møteplassar.

Problemet for trafikantane er at det ikkje er nokon plass å gjere av seg i vegbana.

Eit forslag er skilting i starten av dalen om kvar komande møteplassar er. Dette har mest effekt gjennom Hamrane, der møteplass midt i strekninga er vanskeleg å sjå.

Folk ser ikkje møteplass-skilta, dei blir usikre og tør ikkje køyre. Dermed blir det tetta att i svingane, og ofte med full stopp. Hadde bilane visst om kvar møteplassane var, kunne det løyst litt, seier han.

Nokre av campingplassane har gjeve tilbakemelding om at dei ønskjer nedsett fartsgrense på kortare strekningar, av omsyn til tryggleiken.

Utbetring av fleire flaskehalsar, som strekninga før Tjugen camping, Hamrane og smale parti etter Breng er andre tiltak.

Må dirigere trafikantar

Den store trafikken får store konsekvensar for dei som bur her og næringsdrivande, seier leiaren i utviklingslaget.

Han fortel at dei som driv næring og camping i Lodalen, må bruke mykje tid på å dirigere fortvilte trafikantar. Det er eit apparat som må haldast i sving for å serve turistane både på overnatting og aktivitetar. Dette apparatet møter også på utfordringane med trafikkork, som igjen får konsekvensar for den daglege drifta.

Det er svært hektiske dagar på ein campingplass, og spesielt på gode soldagar i juli. Då er det overfylt av folk, men så fort veret blir dårlegare, minkar det på turistane.

Store bubilar og leigebilar blir det stadig fleire av på vegane, og mange klarer ikkje å rygge med store og ukjende køyrtøy. Mange sjåførar blir redde når dei møter bilar og syklar på smale vegar, og køyrer for sakte og bremsar ned i svingane, meiner han.

Går utover tryggleiken

Trafikkaoset i juli går ut over tryggleiken til dei som bur i dalen, og påverkar beredskapen.

Det såg ein tidlegare i sommar, då ein først kom fram til ei ulukke, men naudetatane kom seg ikkje fram til den mest alvorlege ulukka lenger inne i dalen.

For ei tid tilbake organiserte bygdefolket seg med ei varselordning i Lodalen. Viss det oppstår hendingar med behov for brannbil eller ambulanse, er det telefonar via «jungeltelegrafen» som skal stoppe trafikken lenger nede i dalen.

Det var veldig tydeleg kor effektiv denne ordninga var, under ein grasbrann inst i dalen for nokre år sidan.

Både tilsette i ambulansar og brannvesen har vore ute og rygga vekk bilar frå vegbana for å kome forbi, seier han.

26. Alexandra, Rekordresultat i 2025.

Høgaste omsetjing nokon gong.

Publisert i Fjordingen 28/7-2026.

Av Bengt Flaten (bengt.flaten@fjordingen.no)

Hotelldirektør Richard Grov og økonomisjef Magnhild Hauge kan sjå tilbake på nok eit rekord-år for Alexandra-konsernet. Her i hagen framfor Hotel Alexandra. Loen Skylift i bakgrunnen. FOTO: Bengt Flaten.

Hotel Alexandra i Loen har aldri omsett for så mykje som i 2025, då hotellet bikka 200 millionar kroner med god margin. Totalt omsette alle selskapa i Alexandra konsern for 362 millionar kroner. Opp 27 mill. frå året før.

Alexandra konsern:

Ja, vi er godt fornøgde, seier økonomisjef Magnhild Hauge og hotelldirektør Richard Grov.

Eller heilt greitt, smiler Richard Grov. Og viser til kraftuttrykket frå nabobygda i nordvest.

Hotel Alexandra som morselskap er 100 prosent eigar av Hotel Loenfjord, Loen Active, Hoven Restaurant og Loen Eigedomsselskap. Med unntak av sistnemnde som hadde eit negativt resultat før skatt på ein halv million kroner, leverte alle selskapa solide plussresultat. Og «pengemaskina» Loen Skylift, der Alexandra eig 40 prosent, avslutta året med ein resultatgrad på 52 prosent. All turistaktiviteten i Loen gir dermed solide inntekter kvar for seg og inn i konsernet. Når internfakturering for tenester i konsernet er trekt vekk, utgjer resultat før skatt for Alexandra konsern 70,6 millionar kroner. Det er ein solid auke frå 40,2 mill. året før.

Det høyrer med i totalbildet at vi i fjor investerte 37,8 millionar kroner i vedlikehald og vidareutvikling og samtidig reduserte gjelda. Årsrekneskapen viser ein eigenkapitalandel på 40,3 prosent. Det er solid for vår bransje. Vi er veldig stolte av det vi som lag har fått til i Loen, seier Grov og Hauge.

106.000 gjestedøgn

Medan Loen Skylift fekk inntektene sine frå godt og vel 187.000 gjester, hadde hotella Alexandra og Loenfjord til saman 106.314 gjestedøgn i fjor. Det er ein auke på høvesvis 5.590 for skyliften og ca. 2.000 for hotella. Og frå 2028 kan Alexandra-konsernet rekne inn nye hotelldøgn frå eit tredje hotell, når Loen Base opnar dørene.

Kva med 2026?

Verdssituasjonen med mykje uro og at nokon der ute stadig gjer uføreseielege grep, gjorde at vi valde å budsjettere noko nøkternt. Men så langt har det igjen gått over all forventning. Vi har auka omsetjinga i 1. halvår, samanlikna med 2025. Og det ser ut til at også juli vert betre enn i fjor. Hovudtrekka er ein liten auke i gjestar både frå USA og Nord-Europa, medan Midt-Austen ikkje overraskande viser ein liten nedgang. Men samla er det veldig mykje som tyder på at 2026 blir eit nytt rekord-år, seier Grov og Hauge.

Mykje tilbake til samfunnet

Richard Grov poengterer at konsernet nærast konstant er i utvikling, med nye prosjekt. Nyopna Loen Marina til ti millionar kroner er eitt av mange døme på det.

Vi har nye prosjekt på blokka, som er klare for å setjast i gong berre planar blir godkjende. Alexandra-konsernet praktiserer utvikling gjennom god drift. Vi må tene pengar for å utvikle oss, og utvikle oss for å tene pengar. Og slikt vert det pengar av også til samfunnet. I tillegg til alle avgifter, moms og personskatt frå verksemdene våre leverte vi 17,4 millionar kroner i skatt på fjorårets overskot, seier Grov.

27. Loen Base.Pristilbod.

Fire entreprenørfirma har levert pristilbod på å byggje Loen Base, som vert det tredje hotellet i Loen.

Publisert i Fjordingen 28/7-2026.

Av Bengt Flaten (bengt.flaten@fjordingen.no)

I september vert bygget i bakgrunnen rive, for å gje plass til Loen Base, fortel hotelldirektør Richard Grov. FOTO: Bengt Flaten

Vi har fått inn tilbod frå fire ulike bedrifter og vil gå i forhandlingar etter sommarferien. Deretter er målet er å signere kontrakt i slutten av august, seier hotelldirektør Richard Grov.

Framdriftsplanen er å rive eksisterande bygg på tomta i september, starte rigging i oktober og kome i gang med graving av hotelltomta i november.

Ettersom vi skal byggje i Loen sentrum og vegen må leggjast om, vert det eit tett samarbeid med kommune også med tanke på infrastruktur og alt som skal liggje i bakken. Det vert ein del graving i haust og vinter, så skal ny veg vere klar i april/mai neste år. Då vil bygget og ha kome godt opp av bakken. Det vert eit flott bygg, og når alt er ferdig; med eit veldig fint uteområde, seier Grov.

Nybygget få eit bruksareal på 5.500 kvadratmeter fordelt på fire etasjar. Som startar med parkeringskjellar i underetasjen, ein første etasje med stort bakeri, restaurant og pub og nye lokalitetar for Loen Active. Rett over Loen Active vert det og bygd nytt treningslokale. Hotelldelen med til saman 49 rom vert lagt til 2. og 3. etasje

Dato for opning av Loen Base er sett til mai 2028.

Grov seier at heile prosjektet inkludert moms vil bikke 300 millionar kroner.

28. Loen Marina opna "naust" til 10 mill.kroner.

"Loen marina" har opna dørene for kundane utan bruksløyve.

Publisert i Fjordingen 24/7-2026.

Av Roger Due-Oldeide (roger.oldeide@fjordingen.no)

Uteområdet har fått ei omfattande oppgradering med benkar, terrassar, sandstrender etc. Anleggsgartnar Sandal frå Volda har stått for ein del av utearbeidet. FOTO: Roger Due-Oldeide.

Her har vi samla heile det maritime tilbodet til Loen Active på ein plass, seier dagleg leiar av Loen Active, Erik Brendefur.

I Loen Marina, som i praksis er eit naust, har Loen Active no utleige av trøbåtar, SUP-brett og ei rekkje typar kajakkar i alle storleikar, med og utan guide.

Energistasjonen for fjordvarme, som stod på dette området tidlegare, er ein integrert del av bygget, opplyser adm.dir. Richard Grov i Alexandra som er grunneigar, samt eigar av Loen Active.

Nytt uteområde

I tillegg til bygget, er det lagt ned mykje arbeid i uteområdet med terrassar, benkar, asfalterte gangvegar, utebelysning, beplanting, plenar, sandstrender etc.

Saman med uteområdet har vi no eit betre opplegg til å både halde ved like og å betene området, men også å kunne passe på kundane på fjorden. Det er ikkje alle som er vande med å vere på fjorden, poengterer dei to.

Vil auke aktivitetsnivået i Loen

Dei to fortel at det kan vere større planar for dette området om dei får det som dei vil.

Loen Marina vil auke aktivitetsnivået i Loen, men vi har fleire planar for området som kan ta aktivitetsnivået til nye høgder. Vi kan ikkje seie så mykje om dette enno, men førebels er vi veldig nøgd med korleis dette har blitt, seier Grov.

Prislappen er ikkje klar då det enno manglar nokre garderobar, toalett, utebelysning og litt småfiks.

Men vi kjem nok over 10 millionar kroner i investeringar her, seier Grov.

Skulle vore bygd for lenge sidan

Bygget vart byggjemeldt i november og bygginga starta i januar. Allereie i begynnelsen av juli begynte Loen Active så smått å ta bygget i bruk.

Sjølve bygginga, utført av lokale entreprenørar, har gått fort, men planane for marinaen er mange år gamle, fortel Grov.

Arkitekten Ole Jakob Osvold teikna dette bygget for mange år sidan. Vi ønska å realisere det snarast, men måtte vente i mange år før reguleringsplanen for Loen Nord vart godkjend.

Bygget har framleis ikkje fått bruksløyve frå kommunen, sjølv om vi har alt på det reine, seier Grov.

Bygget burde ha vore på plass for mange år sidan, men no har det opna. Vi synest det har blitt eit anstendig bygg og uteområdet ser bra ut.

Det syder av liv her, akkurat slik vi vil ha det, seier dei.

Har opna dørene: – Loen Marina er ein tilvekst til reiselivsnæringa og lokalbefolkninga i Loen, seier adm.dir. i Alexandra, Richard Grov og dagleg leiar i Loen Active, Erik Brendefur. FOTO: Roger Due-Oldeide.

29. Catrin Sanden tilbake frå Biology Olympiad.(Sjå også artikkel nr 23)

"Det er det kulast eg har vore med på i heile mitt liv.

Publisert i Fjordingen 24/7-2026.

Av Roy Aron Myklebust (roy.aron.myklebust@fjordingen.no)

Den norske delegasjonen: (f.v) Melinka Alonso Butenko, Jacek Kotkowski (deltakar), Ingrid Lærum Winsnes (deltakar), Casper Fjermestad Fretheim (deltakar), Catrin Sanden (deltakar), Margot Ulfsdatter Nyeggen og Finn-Eirik Johansen. Mannen med skiltet er guiden Nikolai Oksanen. Foto:Privat

Catrin Sanden (19) frå Loen kom nyleg heim frå International Biology Olympiad. Utan medalje, men mange opplevingar rikare.

Det er verkeleg det kulaste eg har vore med på i heile mitt liv! Det vart ikkje noko medalje på meg, men opplevinga i seg sjølv er jo løn for alt arbeidet eg har lagt ned i biologien tidlegare, strålar Sanden, som var ein av fire norske deltakarar i «biologi-OL».

Arrangementet fann stad i Vilnius i Litauen og føregjekk over ei heil veke. Der vart dei unge deltakarane testa i mange og krevjande oppgåver.

Prøvene var utfordrande, og det var høgt tidspress, men eg gjorde mitt beste og det var utruleg kjekt. Så at eg ikkje tok med noko medalje heim ser eg ikkje på som eit nederlag, for eg har trass alt vore blant dei 300 flinkaste biologielevane i verda, og fått oppleve noko som svært få på min alder får oppleve, seier Sanden stolt.

Heile verda

Ho opplevde at veka i Litauen fauk av garde, og mellom krevjande prøver fekk dei også høve til å utforske både Vilnius og den gamle hovudstaden Trakai.

Det å få reise til eit nytt land og utforske det, samstundes som eg får jobbe med det eg likar aller best i ei heil veke, er berre fantastisk, strålar Sanden.

Nye venskapsband vart også knytte. Ikkje berre med dei andre norske deltakarane.

IBO har gitt meg moglegheita til å bli kjent med folk i frå heile verda. Alt frå Danmark til Japan og Turkmenistan. Eg har sjølvsagt også blitt godt kjent med og blitt glad i dei andre i den norske delegasjonen, seier Sanden.

Frå Vilnius til Vesterålen

19-åringen frå Loen oppmodar andre om å gripe sjansen når mogelegheiter byr seg.

Det er ei oppleving eg kjem til å ta med meg resten av livet, og eg vil verkeleg oppfordre andre til å berre prøve, uansett kva det gjeld. Ein veit aldri kvar det kan føre hen. For eitt år sidan skulle eg berre ta Biologi 2 som privatist, for å få eit ekstra fag på vitnemålet. Lite visste eg at eg skulle ende opp i Vilnius, med minner for livet.

Sanden reiste elles rett frå Vilnius til Vesterålen. Der venta ei lita ferieveke før nye spennande utfordringar tek til søndag. Då er ho deltakar på European Space Camp på Andøya.

Eg søkte i januar om å vere med, og fekk svar i mars om at eg var valt ut til ein av dei to plassane som Vestland fylke disponerer.

Catrin Sanden kan stolt vise fram akkrediteringa til International Biology Olympiad. Ho var ein av fire norske deltakarar i den litauske hovudstaden